Uvêr i fjellet stengde Hol-Aurland, Tyin-Årdal og Vikafjellet laurdag morgon.
På riksveg 13 over Vikafjellet og Hol-Aurland er det ny vurdering klokka ti, Tyin-Årdal blir ikkje vurdert før klokka tolv. Vegvesenet gjer merksame på at sluttida er usikker og kan verta endra.
I 11-tida var Tyin-Årdal og Hol-Aurland blitt opna, medan det skal innførast kolonnekøyring på Vikafjellet kl 12.
– Elles har me fått meldingar om glatt føre mellom Lote og Nordfjordeid. Bortsett frå det er det stille, men det er tidleg på morgonen enno, seier trafikkoperatør Jørgen Bødtker til Sogn Avis.
– Det er varierande
Det er vêrskifte på gang i store delar av fylket laurdag morgon. I Bergen, kor Bødtker sit, har det vore mildvêr i fleire dagar før det i dag frys på igjen. Hjå oss i Sogn er det omvendt. Etter fleire dagar med snøvêr, er det i dag meldt nokre plussgrader og litt regn i Sogn.
Det kan og blåsa opp til liten kuling frå sør og sørvest på utsette plassar, skriv Meteorologisk institutt i sitt tekstvarsel.
– Det er klart det er veldig varierande. Det gir ulike utfordringar på vegnettet. Entreprenørane er på same tid vera klare over dette, og førebudde på å gjera tiltak.
Han oppfordrar alle til å melda frå til Vegvesenet dersom dei opplever utfordringar langs vegen.
– Og så må eg berre oppfordra alle til å køyra etter forholda, seier Bødtker.