TO: Jerome Akor Adams (19) noterte seg for to scoringar då Sogndal 2 banka Fjøra 4-0 måndag.

Storsiger for Sogndal 2 - sjå alle scoringane her

Det tok fyr etter pause i måndagens lokaloppgjer på Fosshaugane Campus.

Publisert 17.06.2019 kl. 12.17. Oppdatert kl. 21.16.

Det blei ingen scoringar dei første 45 minuttane mellom Sogndal 2 og Fjøra, men etter kvilen blei det meir fart over sakene for det kvite og svarte "heimelaget".


Mathias Sundberg kom godt frå søndagens dugnad som portabel kiosk under a-laget sin kamp, og no var han i staden i aksjon sjølv. Fem minutt inn i omgangen sette han inn 1-0.


Alle måla frå kampen kan du sjå i videovindauget under.



Adams-show

Deretter var det Jerome Akor Adams som stjal showet.


19-åringen har vore vekke mykje av vårsesongen grunna U20-VM og førebuingar til dette, men er no attende på Vestlandet.


Etter 55 minutt dobla han til 2-0, og ti minutt før slutt ordna han sitt andre for dagen til 3-0.


Like etter gjorde midtbanedynamoen Erlend Grov storsigeren komplett til 4-0.


Heng med

Dermed held Nils Tore Krosshaug fram med å levera gode resultat med sitt mannskap, som heng med på øvre halvdel i 3. divisjon med sin sjetteplass etter ti serierundar.


For Fjøra går det noko tyngre, dei er nummer 11, og har eitt poeng margin ned til Vestfossen på feil side av nedrykksstreken.


Siste saker Gå til framsida