Medietilsynet har behandla i alt ni nye søknader om tilskot i år.
Desse var frå Porten.no, Nett.no, Dagbladet Pluss, Bodø Nu, Rana No, Vefsn No, Medier24, Stord24 og Medieselskapet Karmøynytt.
– Medietilsynet har vurdert at dei to lokalavisene Rana No og Porten.no kvalifiserer til å komme inn i ordninga. Rana No er ei redaksjonell uavhengig nettavis med base i Mo i Rana, mens Porten.no er ei heildigital, uavhengig regionavis for Indre og Ytre Sogn, skriv medietilsynet i ei pressemelding.
Nettavisa Medier24 er også ein av dei nye søkjarane i år som får støtte. Publikasjonen skriv særleg om medium, journalistikk, kommunikasjon, sosiale medium og teknologi.
Fakta om produksjonstilskotet
Produksjonstilskotet skal bidra til eit mangfald av nyheits- og aktualitetsmedium over heile landet.
Ordninga er særleg retta mot medium i marknader som er for små til å vera berekraftige og medium som er alternativ til dei leiande media i større marknader.
Produksjonstilskotet skal korrigera for marknadssvikt for mindre nyheitsmedium og nummer to-medium i slike marknader.
Medietilsynet skal fordela 358 millionar kroner i produksjonstilskot i år. Produksjonstilskotet blei fordelt for første gong i 1969.
Ordninga er plattformnøytral og likestiller papir- og nettaviser.
Medium som søker, må oppfylla spesifikke krav til formål og innhald for å få støtte. I tillegg må avisa ha ein ansvarleg redaktør i tråd med krava i Redaktørplakaten, ta reell betaling for innhaldet etter ei offentleg tilgjengeleg prisliste og selja minst halvparten av opplaget gjennom abonnement. Det er også avgrensingar knytte til overskot, driftsmargin og utbytte.