Gå til sidens hovedinnhold

Håvard (18) går på lån til Florø – erstattaren er allereie på plass

Keepertalentet skal få etterlengta kamptrening.

Håvard Hetle (18) skal spela på lån for Florø ut årets sesong, melder Sogndal Fotball på sine nettsider.

– Eg er veldig motivert for å reisa til Florø for å kjempa meg til ein plass på laget der. Hovudmålet mitt er å prestera så bra i år at Sogndal ønskjer meg attende, seier keepertalentet.

Behov for kampar

Grunna koronaviruset blei det ikkje spelt serie i 3. divisjon i fjor, slik at Hetle ikkje kunne spela kampar for Sogndal 2.

Det er framleis usikkert når dette nivået får byrja att, difor meiner Sogndal det er lurt å gje Hetle kamptrening ein anna stad.

– Det er viktig at Håvard får ein god kamp- og treningskvardag, og det er me sikre på at han vil få i Florø, seier Håvard Flo.

Laget frå kystbyen spelar i 2. divisjon komande sesong.

Les mer

Mutert virus gjer at dei ikkje veit når Sogndal får spela kamp igjen – og dette svarar leiaren på om klubben toler eit nytt 2020

Erstattaren på plass

Hetle blei flytta ned på juniorlaget for å få nokre kampar under beltet i andre halvdel av førre sesong, i den samanheng blei Jørgen Johnsen (19) henta på lån frå Vålerenga for å vera backup for Renze Fij.

No er Johnsen henta attende til Sogndal, denne gongen på ein permanent avtale gjeldande ut 2021.

– Han har glidd fantastisk flott inn i gruppa, og me er glade for å ha Jørgen med oss vidare. No som Håvard reiser til Florø på jakt etter speletid, har me behov for ein god andrekeeper etter Renze Fij, seier Flo til klubbens nettsider.

Keepertrenar Geir Stenehjem gjev keeperen følgjande skussmål:

– Jørgen er veldig god på streken, og er ein god keeper som passar suverent inn i gruppa vår.

Kommentarer til denne saken