Klokka 02.03 natt til torsdag fekk naudetatane melding om brann i ein einebustad i Olden i Stryn kommune, opplyser politiet i pressemelding.
Det blei meldt om at det var to personar, ein mann og ei kvinne, til stades i huset då brannen starta. Dei hadde evakuert seg sjølv ut av huset. Då brannvesenet kom til staden starta dei sløkking, og livreddande førstehjelp på mannen, medan kvinna var tilsynelatande uskadd og vart frakta til sjukehus for vidare undersøkingar.
Brannen er sløkt, men brannvesenet vil halda på med ettersløkking ei god stund. Huset er totalskadd.
Like etter klokka 09 stadfestar politiet at ein mann i 70-åra omkom i brannen.
Dei næraste pårørande er varsla.
Politiet har ikkje fått undersøkt åstaden enno, og brannårsaka er framleis ukjend. Saka blir etterforska av lokalt politi i Stryn.