- På mange måtar forskar vi på nye løysingar. Men resultatet skal bli både bra og vakkert, meiner prosjektleiar Aril Hanekamhaug.

Bruforma han og dei andre planleggjarane har enda opp med, er nemleg nokså uvanleg på norske vegar. Brandangersundbrua skal byggjast som ein variant av nettverksbogebruene - som det tidlegare berre er bygt to av her i landet.

- Brandangersundbrua kjem til å få ei litt anna utforming enn desse. På denne brua vil dei to bogane som held brudekket oppe, bli laga av røyr. Staga ned til brudekket kjem til å gå rett ned og likne eit slør, medan dei på andre slike bruer er skråstilte og dannar eit nett, seier Hanekamhaug.

Vegvesenet har i dag lite røynsle med denne typen bruer. Difor blir detaljplanlegginga av Brandangersundbrua gjort som eit forskings- og utviklingsprosjekt i regi av Vegdirektoratet.

Etter planen skal det første anleggsarbeidet på Brandangersambandet ta til i mars/april neste år. Innan utgangen av 2008 skal brua og 11 kilometer veg stå ferdig, til ein kostnad som er rekna til 60 millionar kroner - 60 prosent av kva det ville koste å byggje eit frittfram-bygg over sundet.

Tanken er å byggje brua på verkstad medan veganlegget er under arbeid, og løfte det meir enn 200 meter lange bruspennet på plass når vêret er på det finaste sommaren 2008.