Konserten går over i historia som den fyrste Paperboys-konserten utan Dj. All musikken var "live”, og Veka-publikumet fekk ei stor oppleving.

Hitparade

Paperboys og Vinni har mange hittar på samvitet, og dei kom på rad og rekkje. Wiggle it drog publikum i gang som låt nummer to, og sidan strøymde det på med Tomorrow, Barcelona og mange fleire. Lonesome Traveller, som har vore ein fast travar på alle radiostasjonar sidan i sumar, drog stemninga kraftig opp sjølv om han kanskje kom litt tidleg på setlista.

Ein kunne kanskje tru at dei brende mykje av krutet for tidleg, men energien og låtmateriale var meir enn bra nok til å fylla ein god time med kun hittar.

Krem-musikarar

Vinni hadde med seg nokon av dei fremste musikarane i Noreg. Det nykomponerte bandet bestod av blant andre Anders Møller, kjend frå Euroboys og Kåre and The Cavemen. Saman leverte dei betre enn ein kunne forventa til å vera fyrste konserten med fullt band.

Med nokre fleire spelejobbar saman, blir dette Noreg sitt udiskutable beste rapband. Levande musikk gjer Paperboys eit klart løft, og det blir nesten som ein total maktdemonstrasjon innan norsk rap.

Frontfigur med stor F

Mange klisjear høver godt til å skildra Vinni sin sceneopptreden. Han er overlegen og suveren i alt han føretek seg og har publikum i si hole hand under heile konserten. Mellom låtane kan han framstå som ein sløv og uinspirert fyr, men når beaten byrjar, så er han heilt i eitt med musikken.

Paperboys opna Veka-konsertane på ein glimrande måte, og neste ut er Donkeyboy som spelar framfor eit utselt meieri torsdag kveld.