Inne i tunnelen er arbeidsfolk frå Mika i gang med å sikra dei siste tunnelmetrane med boltar og sprøytebetong etter siste sprenging.

Der tunnelriggen stangar mot fjellveggen, ein dryg kilometer inn frå opninga ved Fatlaelvi, ligg ei skarp lukt av sprengstoff i lufta. Sterke lyskastarar skin på massivt, grått fjell.

– Inspirerande

– Arbeidet går jamt framover, og det er inspirerande å vera med å betra tilhøva for folk her i området. Og det trengs, for dette er ein av dei dårlegaste plassane eg har vore på anlegg, seier riggfører Ole Bjørn Sande, før han klatrar opp i styrhuset på tunnelriggen.

Eit øyredøyvande kvin skjer gjennom lufta i det Sande styrer boret opp i tunneltaket, for å gjera plass til ein ny sikringsbolt.

Opning i desember

Førre veke sette tunnelarbeidarane ny rekord med heile 91 meter ny tunnel, og ifølgje framdriftsplanen kjem gjennomslaget første veka i april.

– Tunnelopninga er sett til desember 2008, og det er heilt usannsynleg at tunnelen kan bli opna noko før det. Etter gjennomslaget er det ein stor jobb med vass- og frostsikring, bygging av vegbane og tekniske innstallasjonar, og det er eigentleg veldig kort tid frå gjennomslaget til opninga, seier prosjektleiar Susanne Svardal i Statens vegvesen.