Tyskaren har slått opp krakken sin ved ferjelemmen i Vik, og slengjer ut snøret med heile fem krokar på.

– I går fekk eg ti sild, og eg likar godt sild steikt i panne, seier Kuchel, som insisterer på at han berre snakkar tysk.

Årvisse gjester

Det er særs fredeleg i Vik denne torsdags morgonen, og på god avstand høyrer ein bruset frå den vassrike Vikja. Nedst i osen sit John Karlsen frå Hasvik og svingar slukstanga, på ferie i Vik for sjette året.

– Elva her er flott tilrettelagt, og eg trivest godt på ferie her i bygda. Men fisket har vore dårleg så langt, kanskje på grunn av kaldt vatn. Men Vikja er jo ein sein elv, så det kan nok komma, seier finnmarkingen.

Austlendingar

På andre sida av elva kvin det i lufta medan Rolf Sørensen frå Hvaler og David Vogt frå Hvasser fleksar med flugestengene.

– Det er få lakseførande vassdrag der me kjem frå, så me gler oss over å koma ein stad der det er laks, seier Sørensen.