– Bileta er frå åra 1927–1955, med eit avbrot av 1939–1947. Ut frå bileta er det tydeleg at eigaren eller eigarane har sterke band til Vestlandet. Eitt av bileta er frå Marit sin fire årsdag i Fjærland, fortel Lena Hamre, som håpar lesarar i Sogn Avis kan hjelpa henne til å løysa mysteriet.

Tette band

Lena bur i den vesle marknadsbyen Chorley nord for Manchester. Ein dag ho var på auksjon, kom ho over dei to fotoalbuma.

– Eg skulle gjerne visst kvifor dei to albuma hamna her i den vesle byen min. Dersom det er av interesse, sender eg gjerne fotoalbuma til sitt norske opphav, seier Hamre, som ikkje er i tvil om at eigarane må ha hatt tett kontakt eller har slekt i England.

Ut frå bileta er det ingen tvil om at dei etter dåtidas målestokk, må ha vore velståande for å kunna reisa så mykje og vide. Her er mellom anna bilete frå eit bryllaup og dei nygifte på bryllaupsreise i Himalaya.

Fødseldag i Fjærland

På ein del av bileta kjem det klart fram at det har vore god kontakt til Vestlandet. Nokre av bileta er framkalla i Bergen, men diverre er det få namn.

Det beste sporet Lena har er eit bilete som viser at Marit feira fire årsdagen sin i Fjærland sommaren 1947, og eit bilete av ei bunadskledd jente framfor juletreet i London, jula 1937/1938.

– Eg håpar Sogn Avis-lesarar som kan hjelpa meg å finna fram til kven som har vore eigarar av fotoalbumet. Like eins vil det vera kjekt å få vita historia bak fotoalbuma og korleis dei enda på ein auksjon her i byen min, seier Lena Hamre.