Her er eit nytt biletglimt frå gamle Luster.

I november i fjor starta arbeidet med å samla inn og registrera tekstar til to store biletsamlingar frå Luster. Samson Brathole var fotograf og den store samlinga med glasplater etter Brathole fekk De Heibergske Samlinger – Sogn folkemuseum i gåve frå Olav H. Lavoll i 1979. Biletsamlinga frå amatørfotograf Johan R. Døsen fekk museet i 1998. I alt utgjer dei to samlingane nær 800 bilete. I samarbeid med De Heibergske Samlinger – Sogn folkemuseum og Fylkesarkivet i Sogn og Fjordane, har Luster sogelag vore sterkt engasjert i arbeidet med å samla inn informasjon til bileta. Sogn Avis presenterer nokre av bileta frå gamle Luster, og lesarane har òg vore gode medhjelparar.

Fylkesarkivet oppmodar alle interesserte til å bidra med opplysningar om bileta. Informasjonen som vert samla inn, vert elektronisk registrert i Fylkesarkivet sin database. Dermed vert alle bileta tilgjengelege for alle interesserte på Fylkesarkivet sin nettstad.

Ved å velja foto og søkja på Brathole og/eller Døsen, vil du kunna følgja med i korleis arbeidet med dei to samlingane går framover.

Veit du kven personane på bileta kan vera?

Kontakt Luster sogelag ved Bjørg G. Hovland eller Trygve Skjolden.

Når opplysningane om biletet er ferdigregistrerte og kvalitetskontrollerte, vil "fasiten" bli publisert på fylkesarkiv.no