Sette flott punktum med løyperekordar

– Det gjekk greitt. Duskregnet gjorde at det ikkje vart so kokheitt og eg prøvde å springa jamnt heile vegen, seier Skjeldal, og tykte det var greitt å kunne setja løyperekord i den siste utgåva av Fanaråkløpet som reint landevegsløp.

– Veldig greitt det, seier Kristen Skjeldal, og opplevde løpet som langt meir spennande enn han hadde trutt.

– Når eg har køyrt her med bil, så har det verka flatt. Når eg starta viste det seg å vera meir kupert enn som så, og ekstrasløyfa i starten var eg ikkje klar over, seier Skjeldal. Og legg ikkje skjul på at det var tida til Pål Gunnar Mikkelsplass han hadde sett seg som må å slå.

– Eg trur eg skal ringa til han i kveld, seier Skjeldal, som knuste rekorden på dei 7,5 kilometrane med godt over minuttet.

Sterkt av Simmenes

Enno meir suveren var Britt Helen Simmenes i dameklassen. Ho pressa seg under den gamle rekorden med fantastiske 14 minuttar.

– Løypa er flat og fin og passar meg godt, men det var litt kjedeleg å springa så mykje åleine som eg gjorde i dag, seier Simmenes. Ho spring mest på bane, men prøver og å få med seg ein del av mosjonsløpa.

– Det er ikkje så mange mosjonsløp i Sogn, det er synd. Eg trur arrangørane må bli litt flinkare til å publisera løpa. Springing er den enklaste mosjonsidretten, så det burde absolutt vera folk som kan vera med på mosjonsløpa, seier Simmenes. Og likte seg på vegen mellom Skjolden og Fortun.

– Synd løpet skal leggjast ned.

Heilt til topps

Neste år vert utfordringa i Fanaråkløpet langt tøffare. Då skal landevegsløpet bytast ut med ein duatlon frå Skjolden til toppen av Fannaråken. Først ein sykkeletappe frå Skjolden til Turtagrø, så løp vidare til Fannaråken.

– Få deltakarar har gjort at me har tenkt lenge på å avvikla løpet i noverande form og håpar på at ein duatlon vil trekkja fleire deltakarar, seier leiaren i friidrettsgruppa i IL Fanaråk Svein Steig.

Det er i alle fall sogndøl og medlem i styret for Kondis, Christian Prestegård, viss på. Han har gått i bresjen for suksessen Skåla- til topps, og trur det nye opplegget for Fanaråkløpet vil trekkja over 200 deltakarar alt neste år.

– Berre ein annonse i bladet Kondis vil gje 150 løparar, seier og trur på ein vinnartid ned mot ein time og femti minuttar. Om dei to vinnarane av årets Fanaråkløp tek den nye utfordringa er usikkert.

– Eg hadde nok blitt parkert på sykkeletappen. Eg er ein liten og lett løpar som trivst best på flate, ikkje alt for lange løp, seier Simmenes.

Skjeldal er og litt skeptisk til å ta utfordringa neste år, men ikkje avvisande.

– Sykling er ikkje det store for meg. Eg likar meg best når eg kan få ha joggeskoa på heile vegen. På ei anna side er lange og utfordrande løp noko som lokkar for meg. Me får sjå korleis det passar inn med andre ting, seier Skjeldal