Fuglesteg avrundar ein flott sesong, med helgeope, servering og konsert i kulturfjøsen

–Dette er siste helga med ope hus og servering denne sesongen, seier Stein Bugge Næss, leiar i Luster Tur­lag.

Han fortel om uvanleg god trafikk heile som­maren.

Seks veker

–Seks veker var det servering og omvising kvar dag, og elles har det vore dugnadsfolk på vakt alle helgar frå slutten av mai, fortel han.

Luster Turlag reknar med at mellom 4.000 og 5.000 har vore inne på tunet og fått med seg den makelause utsikta og det flotte bygningsmiljøet som har vorte gjenskapt dei siste åra på denne høgdegarden, 630 meter over havet. Fleire hundre overnattingar har dei hatt, og mange har feira runde dagar i steinstove og fjøs.

–I turlaget er me spesielt stolt av å kunna visa fram den tredje bygningen, tømrastova som vart redda frå brannen i 1985, og som no er sett i stand på beste måte. Det er fint å sjå levande potteplanter og kvite gardiner att i stova, seier Bugge Næss.

Konsert

Turlaget slår på stortromma denne til helga og gjennom eit samarbeid med Turtagrø hotell har dei fått henta Christoffer Øien som skal opptre akustisk med bandet sitt i kulturfjøsen midt på dagen laurdag.

–Me trur dette skal bli ein fin konsert som passar for publikum i alle aldrar. Sogndal Turlag har fellestur til konserten frå Berdalsfjellet og ned til Fuglesteg via fjellstølen og vårstølen. Publikum elles, både dei som er i Turtagrø på Fjellfilmfestivalen og alle andre som vil vera med, kan ta seg fram på eiga hand anten nede frå Fortun eller oppe frå fjellet, seier turlagsleiaren som har med seg ein flott dugnadsgjeng som stiller med hellekaker, rømme, syltetøy og kaffi og saft til alle som vil ha servering.