Klatring er i vinden som aldri før i Sogndal.

I vekst

Klatreforbundet er eitt av dei særforbunda til Norges Idrettsforbund som er i størst vekst.

Ken Eivind Thompson og Lisa Bjærum frå Sogndal Klatreklubb merkar godt den auka populariteten. No må dei utvida tilbodet for å få plass til alle som vil vera med. Og det er dei yngste, som er ivrigast.

– Me merka det i fjor at det var stor pågang og mange barn me måtte seia nei til, seier Bjærum.

Difor utvidar dei no med blant anna ei ekstra gruppe for ungar frå 10–12 år, samt eit barn- og foreldrekurs, der enno yngre barn skal få høve til å ta del. Tanken er at foreldra skal læra seg å sikra, slik at dei sjølve kan ta med seg barna på klatring.

Alternativ

Ken Eivind Thompson trur klatring som aktivitet kan vera eit godt alternativ til konkurransejaget som kan dominera i andre idrettar. Samstundes håpar han at foreldre og barn ikkje let seg skremma av ekstremsportstempelet idretten har fått.

– Før når klatring var synonymt med Trollveggen, så var det kanskje litt annleis. Men klatring har blitt veldig mykje meir enn den ekstremsporten det kanskje har fått rykte på seg for å vera, seier han.

Thompson seier òg at det berre er ein liten del av dei som driv aktivt med klatring, som deltek i konkurransar.

– Det er mange som kan finna noko i klatring, som kanskje ikkje synst noko om den konkurransebiten, seier han.

Populært

Då Lisa Bjærum frå Oslo kom som student til Sogndal fekk ho høyra at her er det fotball som gjeld. Sjølv hadde ho høyrt mest om ski og klatring.

– Det er utruleg mange eldsjeler her, som er med på å inspirera andre. Eg trur ungane merkar det òg når dei har engasjerte instruktørar, seier ho.

• Les også: Topp klatring i storvegg
• Les også: Verdas beste klatrar vitja Sogndal.