Tjuveriet på Årdal Mote er det tredje i Årdal i sommar, og ved første augekast er det store likskapar mellom innbrotet på klesbutikken og innbrotet på Tangen Sport førre månad.

LES OGSÅ: Nytt innbrot i Årdal

LES OGSÅ: Innbrot på Tangen sport

Også då tok tjuvane seg inn ved å bora seg gjennom døra, og dei var svært selektive i det dei tok med seg.

– Modusen er den same, og me kan berre tenkja vårt. Det me ser her og no er at dette er eit selektivt grovt tjuveri, men det er for tidleg å seia noko meir enn det, seier politifyrstebetjent Helge Øvstetun til Sogn Avis.

Ingen gjennombrot

Innbrotet er som kjend det tredje innbrotet i Årdal i sommar og det fjerde i 2012. Politiet har ikkje gjort noko gjennombrot i nokon av desse sakene.

– Me har desverre ikkje registrert gjennombrot på desse. Det kan vera ei trend i Årdal for tida. Der det er lettvint å koma seg til - der får ein besøk, seier Øvstetun.

– Det set ein støkk i butikkeigarane, og det er trist at ein ikkje får driva lovleg verksemd utan at slikt skjer, legg han til.

Leitar etter DNA

I likskap med eigarane trur Øvstetun tjuvane har vore i butikken og orientert seg på førehand.

– Eg trur dei har vore innom og i ei viss form fått ei orientering om kva butikken har å tilby og for å sjekka alarmar og liknande, seier han.

Politiet vil no etterforska saka vidare og gjera kriminaltekniske undersøkingar.

– Me tek med oss kassar og liknande tjuvane kan ha vore borti for å sjå etter fingeravtrykk og sikra moglege DNA-spor, seier Øvstetun.

Politiet ønskjer tips på telefon 02 800.

LES OGSÅ: Frekke tjuvar raida klubbhus

LES OGSÅ: Grovt tjuveri på Prix