I forrige veke lovde investor Oddvar Røysi 25 000 kroner til den som kunne hjelpa med å fakka den frekke planketjuven som hadde teke for seg av cruisekaien på Skjolden. No viser det seg at den forsvunne stolpepynten aldri hadde vorte montert.

Entrepenøren hadde rett og slett gått tom.

Reagerer

Det har fått somme til å reagera. I eit anonymt brev til Sogn Avis vert det uttrykt sterk misnøye over dei falske skuldingane.

– Fleire på Skjolden ser med undring på at Oddvar Røysi har peika seg sjølv ut til?«moralens vaktar» på Skjolden. Meinar han at noko har vorte stole, må han snarast melda dette til politiet. Det gjer han ikkje av den enkle grunn at ingenting er fjerna, og det ville politiet brukt 10 sekund på å stadfesta, står det i brevet.

Fekk tips

Oddvar Røysi var på søndag sjølv inne ved cruisekaien for å sjekka dei omtala stolpane. Då kom han til same konklusjon som dei anonyme brevskrivarane: pynten har aldri vore montert. Røysi har fått klarheit i at det var entrepenøren som skal ha gått tom, men seier dette er noko han aldri fekk melding om.

– Dette er ei beklagelig hending, seier Oddvar Røysi til Sogn Avis.

– Me fekk eit tips om at dette var stole og reagerte umiddelbart på det. Me følte me hadde sett oss greit inn i saka, seier Røysi.