Green Granadas var første mann ut og heldt ein ellevill og forrykande konsert på hovudscena på Breim etter at Liv Signe Navarsete stod for den offisielle opninga av festivalen i Trivselhagen på Sandane.

– Fokus på dugnad, samhald, tilhøyrsel og stadfesting er essensen for eit vellukka arrangement i distrikta, sa Liv Signe Navarsete i opningstalen.

Ein slik festival er utruleg viktig for regionen og tilreisande får eit forhold til Breim, meiner kommunal­ministeren.

– Slike arrangement og festivalar er omfattande og gjer noko med identiteten til bygdene. Det ligg ein enorm dugnadsinnsats bak, og samhaldet i regionen vert styrkt. Om me ser på Breim, var det tidlegare ein stad der mange berre hasta forbi, ein stad dei kanskje aldri hadde høyrt noko særleg om. Men sjå no, dette er blitt ein festival med titals tusen be­søkjande, ein plass som blir lagt merke til. Resultatet av dette er mellom anna knute­punktstatusen dei har fått. Knutepunkt gjev tryggleik og syner styrke, sa Navar­sete då ho opna knutepunktfestivalen i Nordfjord.

Og no er det køntri for alle pengane i Breim - i kveld står mellom andre Vince Gill på scena..