– Det er heilt unike høve på Sognefjellet no. Normalt må me leggja skiløypa lenger vest, men no går den rett frå hyttedøra, seier Ove Fortun, dagleg leiar på Sognefjell Skisenter.

– Eit eldorado

Fortun er kjempenøgd med forholda i den seks kilometer lange løypa.

– Det er eineståande forhold for både klassisk og skøyting, og me har hatt god aktivitet her sidan juni. Me saltar løypene slik at dei skal halde seg faste og gode. Folk kosar seg i sommarklede her oppe.

Frå Kirkenes

Han seier at folk kjem langvegsfrå for å trena i løypene på Sognefjellet.

– Folk har teke turen heilt frå Kirkenes, og i dag har me ein familie frå Bodø her. Folk reiser langt for å oppleva dei gode løypene.

Lang sesong

Planen er å halda løypene i drift til midten av juli, før dei vert flytta vestover og nytta der ein månad.

Han håpar at enda fleire vil sjå moglegheita for skigåing i sommarsola.

– Skieliten har vore her, og både utøvarar frå Luster og Lom nyttar løypene aktivt. Likevel er det sørgjeleg at ikkje fleire veit om denne moglegheita, seier Fortun.