– Eg stod opp i dag, og la meg på sofaen. Klokka ni vakna eg av ei forferdeleg during. Alt som låg på bordet skramla, og det høyrdest ut som ei tung maskin køyrde forbi, forklarar Aud Irene Loven i Aurland.

Ubehageleg

Det er ikkje første gong Loven opplever jordskjelv.

– Det minna mykje om førre gong me opplevde det her. Eg tykkjer ekstremvêr og slik er litt spennande, men der er jo litt ubehageleg når det skjer fleire gonger.

Veggene rista

Også i Fresvik blei jordskjelvet observert.

– Eg var i uthuset då det plutseleg byrja å klirra i veggene. Fyrst blei eg usikker på kvar vibrasjonen kom frå, då eg stod heilt i ro. Like etterpå såg eg på nyheitene at det var meldt om jordskjelv i Hordaland, nøyaktig på same tidspunkt som eg opplevde ristinga her, forklarar Udvin Breilid.

Utan skadeverknader

Jordskjelvekspert ved Universitetet i Bergen, Kuvvet Atkan, fortel til Bergens Tidende at jordskjelvet hadde episenter om lag midt mellom Vaksdal og Norheim i Hardanger og målte 3,0 på Richters skala.

Det er berre tre månader sidan Voss og Fedje på same dag blei skaka av jordskjelv på høvesvis 3,3 og 3,2 på Richters skala. Ei veke tidlegare blee Etne utsett for eit skjelv på 3,5.

– Det har vore mange skjelv på rundt 3 på skalaen i Hardanger og på Vestlandet. For at det skal vera skadeverknader, må me kome over 4,5 og 5, seier han til BT.no

Sist gong Vestlandet opplevde eit skjelv på den storleiken var i 2000, då eit jordskjelv utanfor Sotra og Øygarden blei målt til 4,5