Klokka 01.00 natt til søndag måtte politiet ta hand om ein overstadig rusa mann. Politiet kom over mannen som låg ute i Leikanger sentrum. Mannen, som er i 50-åra, vart teken hand om av helsepersonell og køyrd til Førde sentralsjukehus.

Jonsoknatta hadde meir å by på for politiet i Indre Sogn.

Politiet fekk klokka 01.45 varsel om ein hund gjekk laus ved ein utestad i Vik sentrum. Eigaren, ein mann som viste seg å vera rusa, fekk beskjed om å ta med hunden heim att.

Klokka 03.10 melder vitner frå om skadeverk på ein personbil på Leikanger, og dette blir følgt opp at Sogndal lensmannskontor.

Klokka 03.36 vart det meldt om skadeverk på ein bil i Vik. Politipatruljen kom over ein bil i sentrum der vindauge og tenningslåsen var skada. Bilen var utlandsregistrert.

Vik lensmannskontor kjem til å følgja opp saka.

Politiet hadde også ein fartskontroll i Øvre Årdal på jonsokkvelden. Kontrollen vart gjennomført på fv 53 i 80 km/t sone. Tre førarar fekk forenkla forelegg, og høgste målte fart var 102 km/t.

I 05-tida natt til søndag er politiet blitt gjort merksame på at ein båt utan påhengsmotor ligg på rek i Årdalsvatnet utanfor Naustbukttunnelen. Det var ikkje personar i båten, og politiet ber dei som har opplysningar om å ta kontakt.