«Mykje lår, mykje hår, men det følast godt å ikkje vere blyg,» skreiv Tone Damli Aaberge på bloggen sin måndag føremiddag. Då vart den nye, og sexy videoen til den nye låten «Look back» sleppt. Den har skapt mykje debatt på nettet, og denne gongen har popprinsessa frå Sogndal fått mykje meir ros enn ris.

– Det har vore kult, sjeldan har eg fått så stor og så positiv respons på noko eg har gjort.

Lanseringsstrategi

På telefonen frå Oslo avslører Tone at strategien bak lanseringa av den nye låten – og ikkje minst den nye videoen – har fungert hundre prosent – og vel så det.

– Me la jo planar, veit du. Og det vart suksess tvert. Nr 1 på iTunes første dagen, og så lista på P3 for første gong. Men det viktigaste er alle dei gode tilbakemeldingane frå folk. Mange likar denne låten, rett og slett, seier Tone.

Skryt frå Fuller

Mange meiner mykje om Tone slik ho framstår i den nye videoen. Mest pris set ho på tilbakemeldinga frå super­manager Simon Fuller som har stjerner som David Beckham (36), Jennifer Lopez (42) og Spice Girls i stallen.

– Han er vand med å sjå verre ting enn videoen min. Dette er rein søndagsskule, for han, for å seia det slik, ler Tone.

Ho tykkjer elles det er stor stas med så positiv respons frå redaktør i Cosmopolitan, Ingeborg Heldal, som jublar over Tone sin nye musikkvideo til Dagbladet.

Videoen kan du sjå her på bloggen til Tone.

Les heile intervjuet med Tone Damli Aaberge i papirutgåva av Sogn Avis onsdag eller i e-avisa.