Einar Målsnes (H) er leiar i kontrollutvalet, og krev at ordførar Harald N. Offerdal (Ap) møta i utvalet 20. februar. Utvalsleiaren krev at ordføraren svarar for at både den politiske og administrative leiinga ikkje var i kommunen då uvêret Dagmar slo til.

Sjekka ikkje

Kontrollutvalet har møte fire dagar etter møtet i kommunestyret, der Høgre-gruppa har sendt inn ein interpellasjon med seks spørsmål.

I Balestrand har mange merka seg at Einar Målsnes alt 3. januar var ute og skreiv på Facebook og kommenterte at «Ordførar og rådmann i Balestrand på ferie då bygda merka Dagmar som verst. Dei ansvarlege må sette seg inn i beredskapsplanane i kommunen og ta sitt ansvar som går frem av dei.»

– Leiaren i kontrollutvalet trekkjer konklusjonen utan å sjekka fakta. Eg tykkjer det er uheldig å bruka Facebook til å kommentera saker som ein seinare skal handsama. Det er problem å ha tillit til ein leiar som bruker slike arbeidsmetodar, seier Offerdal.

Inviterte

Etter møtet i kriseleiinga er det skrive ein logg over viktige hendingar, tiltak og evalueringspunkt. Det er i ettertid sett opp evalueringspunkt i høve hendingar og tiltak. Kommunen inviterte òg via heimesida til å koma med innspel i forkant av den første evalueringa.

Det kom inn fire innspel. I tillegg har kommunen laga utkast til ein tiltaksplan på 14 punkt.

Ope møte

Kriseleiinga i Balestrand har hatt den første evalueringa av korleis dei handterte uvêret lokalt i Balestrand 4. januar, men ordføraren ynskjer innspel frå folk som bur i grendene og røynslene deira.

– Me inviterer til eit evalueringsmøte, og bed om innspel. Balestrand Røde Kors vert invitert for å drøfta nærare deira rolle i krisesituasjonen, seier Offerdal. Han framhevar kor viktig det er å sjå på slike hendingar og evaluera kva som vart gjort og kva som kan gjerast betre.

Dårleg kjemi

– Sit du med ei kjensle at Høgre skal ta hemn for at du vart valt til ordførar og ikkje Einar Målsnes?

– Det må du spørja dei om, men eg sit unekteleg med ei kjensle av at det er eitt eller anna her, seier Harald Offerdal.