Korvald har kalla inn ekstramannskap i tru på at mange vil sesongdebutera i bakken, og at mange vil sikra seg sesongkort. Han er svært glad for at snøen har lava ned og sytt for sesongstart i god tid før jul.

Ryktet har gått

– Det er viktig for økonomien til skisenteret at me kjem i gang i god tid før jul, seier Korvald.

Han og staben hans hadde ein aldri så liten tjuvstart på heisanlegget søndag og fekk mange snøhungrige gjester på besøk. No har det kome gjester langvegs frå for å bada i laussnøen i Sogndalsdalen, etter at ryktet om djup laussnø har spreidd seg på facebook og i media.

Sjå skifilm frå Hodlekve filma søndag.

Flotte langrennsløyper

Også langrennsfolket i Sogn jublar over strålande tilhøve. Både birkebeinerar og andre på bortoverski har endeleg fått underlaget dei har lengta etter. Måndag var det mange som tok sin første langrennstur for sesongen.

– Vinteren kom litt brått på oss, så det har vore travel jobbing dei siste dagane med å få alt på stell. Men no kryssar me skia for at alt fungerer, seier Amund Korvald ved Sogndal Skisenter.

Ikkje opne på Hafslo

Bjørn Berge, som er ny dagleg leiar ved Sogn Skisenter på Heggmyrane, fortel at dei ikkje er heilt klare til opning enno, og at dei er avhengige av kuldegrader for å få starta snøkanonene.

– Me skal ha testkøyring i helga og håper på meir snø og kulde. Me håper omsetninga aukar denne sesongen og passerer to millionar, seier han.

Langrennsløypene på Heggmyrane er ikkje oppkøyde, då det framleis er blautt i marka.