Sju søkjarar, tre menn og fire kvinner, har meldt interessa si for kommunalsjefstillinga i Årdal, som blir ledig i Årdal, etter at Alf Olsen jr går til jobben som rådmann i Lærdal i oktober.

Fire av søkjarane meiner det er i orden at namna deira blir offentleggjorte; høgskulelektor Anita Heggebø frå Bergen/Vindafjord, faglærar Geir Hansen frå Årdal, sjukepleiar Rebecca Hartman-Thim frå Lærdal og kommunalsjef Åse Vik frå Øygarden.

Dei tre som ikkje vil ha namnet sitt offentleggjorte i denne omgangen, er ein kvinneleg og ein mannleg kommunalsjef, samt ein mannleg leiar i det private næringslivet. Kjem nokre av desse tre i posisjon til å bli innstilte til stillinga, er det ein føresetnad at namna deira blir offentlege.

Rådmann Ingvar Laberg fortel at dei har fått gode kandidatar å velja mellom, og at framdriftsplanen er at utveljing og intervju av dei aktuelle søkjarane skal vera gjennomført innan utgangen av veke 36. Held denne framdriftsplanen, vil tilsetjing av ny kommunalsjef gå føre seg i formannskapsmøtet 21. september.