– Det er svært lite ryper i fjellet, seier Lars Voll, styremedlem i Vik grunneigarlag.

Kuttar vinterjakta

Grunneigarane i sone 2 og 3, det vil seia i området ved Vikafjellet, har hatt styremøte der den kommande småviltjakta vart diskutert.

– Me har vedteke å utsetja jaktstarten med 15 dagar. Dermed vert det opna for jakt frå 25. september, i staden for 10. september som er vanleg, fortel Voll.

I tillegg har grunneigarane bestemt seg for å kutta ut vinterjakta. Siste jaktdag vert 23. desember.

Freding neste

Voll fortel at talet på ryper har blitt kraftig redusert dei siste ti åra. Fjoråret var elendig.

– Me må gjera tiltak for å få bestanden opp att. Neste trekk kan bli å freda området for jakt, og det er eit drastisk tiltak, seier Voll.

Varierer mykje

Viltforvaltar Hermund Mjelstad ved miljøvernavdelinga hos Fylkesmannen fortel at totalbiletet for rypejakta i fjor var dårleg over heile landet. Han har fått tilbakemeldingar på at det er meir smågnagarar i fjellet i år, og det er vanlegvis eit godt teikn.

– Men det er store variasjonar frå fjell til fjell, så det er vanskeleg å gje eit godt svar på korleis jaktsesongen vert, seier han.