Fredag 27. august går stafettkonserten "Rundballerock" av stabelen på ferjekaien i Fjærland under Rundballefestivalen.

Krav til banda som deltek, er at minst ein av songane dei spelar må kunna knytast til rundball – noko rundt, fylt av gras, eller pakka inn i plast. Her går mange songtitlar an, frå "The green, green grass of home" til "Det går rundt og rundt", heiter det i ei pressemelding.

– Me har den mest originale rockekonserten på den tøffaste festivalen i landet, og her set berre fantasien grensene. Andre sine eller eigne komposisjonar spelar inga rolle, så lenge publikum tenkjer rundball når dei høyrer songen, seier Eivind Ødegård i rundballenemndi.

Rundballerocken er open både for små og store band, unge og gamle deltakarar. Det vert pengepremie til kveldens beste band.

Fleire band frå heile Vestlandet har meldt seg på. Mellom dei er Sandmarx, Master of command, Blackout dreams og Demolition crew. Det er enno plass til fleire band.

– Me håpar fleire band melder seg på, og at svært mange tek vegen til Fjærland denne kvelden og får med seg ein fantastisk konsert, seier rock-ansvarleg Ødegård.