– Det er berre bra for huda med litt gjørme, ler dei to.

Fordel

Jentene fekk ideen etter å ha vore på utdanningsmesse med skuleklassa i Oslo tidlegare i år. Der var det særleg utdanningstilbodet i Forsvaret som fenga:

– Eg har lenge tenkt på å bli politi, og tenkjer at eit år eller to i militæret vil vera ein fordel då, seier Anne Linn, som skal gjennomføra førstegongstenesta i hæren.

Malene er framleis ikkje sikker på kva ho vil i framtida og ser på førstegongstenesta i sjøforsvaret som eit annleis friår før ho vidareutdannar seg.

– Dessutan tenkjer eg at me vil bli meir ettertrakta i arbeidslivet med tanke på at få jenter gjennomfører forsvarstenesta, seier ho.

Utfordring

At dei i det komande året vil møta på mange utfordringar, er jentene klare på. Men fullføra skal dei:

– Eg trur det blir hardt, spennande og ei enorm utfordring, seier Malene.

– Men når me fyrst har byrja, kan me ikkje gje opp.

– Eg gler meg til å sjå kor hardt eg kan pressa meg sjølv. Det har nok mykje med psyken å gjera om ein held ut, meiner Anne Linn.

Afghanistan

Foreldra til dei to jentene har vore positive til valet.

– Men dei likar ikkje at eg har sagt ja til å reisa til Afghanistan etter førstegongstenesta, fortel Anne Linn og held fram:

– Eg er nyfiken og tykkjer det verkar spennande å sjå sjølv korleis det er der nede med eigne auge, og ikkje berre sjå det på TV.

Om det er riktig av Noreg å vera til stades med styrkar i landet, er jentene usamde i.

– Eg tykkjer det er greit at me er der for å bevara freden, men det er eit vanskeleg spørsmål, seier Anne Linn og får støtte frå Malene.

– Det er vanskeleg å ta eit standpunkt, men det har vore mykje dødsfall der nede no. Mange unge har blitt drepne på kort tid, så det er kanskje på tide å trekkja seg attende, meiner ho.