Leitinga etter kvinna, som skulle gå frå Undredal til Stegen, vert om ikkje lenge avslutta for kvelden. Men i natt skal i alt fire såkalla lyttepostar vera ute i terrenget.

– Dette er hundar med hundeførarar, som vil kunne merka seg lydar i terrenget, seier innsatsleiar Magne Knudsen frå Årdal lensmannskontor til Sogn Avis.

Sjølv er han svært imponert over innsatsen til dei mange som dei siste dagane har vore med og leita etter den sakna kvinna.

– Familien til den sakna er i Undredal, og dei følgjer tett på aksjonen. Dei og er svært takknemlege for den innsatsen folk legg ned for å finna ho, seier Knudsen til Sogn Avis onsdag kveld.

SeaKing-helikopteret frå redningsbasen i Florø har også i dag vore med på leitinga, saman med mannskap frå mellom anna Sivilforsvaret, Røde Kors, fjellklatrarar frå bregruppa i Jostedalen og andre.

– Dei gjer alle ein heilt fantastisk innsats i denne svært krevjande aksjonen, meiner innsatsleiar Magne Knudsen.