Det er verdas største overnattingsorgansisasjon, Hostelling International, som står bak rangeringa bygd på nettsvar frå brukarane.

– At me kjem så godt ut, er me naturlegvis veldig nøgde med, seier John Håland.

Millionsatsing

Han driv Flåm Camping og Vandrarheim saman med kona Marte og foreldra Erling og Gjertrud. Campingplassen er tidlegare kåra til beste i landet av Norsk Caravan Club. No er det vandrarheimen som tek prisen. For eitt år sidan vart millionsatsinga med 50 senger fordelt på seksten rom, tomanns- og firemannsrom, teken i bruk. Saman med det tidlegare tilbodet kan verksemda tilby 80 vandrarheimsenger.

Måtte satsa

Medan den gamle vandrarheimen hadde felles sanitærrom, har den nye dusj og toalett på kvart einaste rom.

– Mange av gjestene etterspør bad på romma. Det hadde me lite av før. På den andre sida er ein del ute etter billegare løysingar slik me tilbyr i den gamle delen. No har me begge deler, seier Håland.

Han fortel at tanken om å utvida vandrarheimtilbodet har vore der lenge, og er glad for at dei gjorde alvor av planane.

– Me måtte berre gjera det, og erfaringane er udelt positive. Bygget fungerer kjempeflott. Med store fellesareal og sal av enkeltsenger har me klart å følgja opp grunntanken med vandrarheimkonseptet. Me er veldig nøgde, seier Håland.