Hotellsjef ved Kviknes Hotel, Kari Kvikne, legg ikkje skjul på at turisttrøkket har avteke siste åra.

– Men det er betre enn i fjor, fjoråret var dårleg, seier ho, som er desto meir nøgd med responsen på kurs- og konferansesida.

Kurs og konferanse

Med dei dystre utsiktene for fjordhotella, er storhotellet i Balestrand glad for å vera oppe og gå på eit nytt og moderne kurs-/konferansetilbod.

I den tradisjonelle marknaden er det stille, altfor stille. Det er ikkje berre i Balestrand ein merkar det. Turistlandet Norge har lite å gle seg over i eit ti års perspektiv. Aftenposten skreiv tidlegare i sommar at turisttrafikken her til lands er attende på før 1998-nivå.

Må vera aktive

– Me rapporterer ikkje om eit veldig negativt bilete, seier Kari Kvikne, men det er stille om ein måler mot slik det var før.

No blir det lagt merke til om fem bussar har parkert ved Kviknes for natta. For ti år sidan var ti-elleve bussar normalen.

Kari Kvikne seier hotella må vera aktive i marknaden, også på utradisjonelt vis.

– Det må utprøvast nye kanalar, som facebook, der me har gode erfaringar frå i fjor og i år, seier hotellsjefen.