Vik Sparebank, som er eigaren av bygget, har sett i gang planane for utbygging for å utvikla eigedomen. Ein ny etasje skal etter planen byggjast på, og dei to øvste etasjane skal verta leilegheiter.

– Dei nye leilegheitene vil liggja midt i sentrum med gangavstand til alt, så me vågar å tru at dette er eit attraktivt prosjekt, seier banksjef Mats Indrehus.

Nytt og gamalt

Det er det lokale arkitektfirmaet Jon Vikøren AS som har utforma planane for ombygginga. Gamlebanken er eit døme på 60-tals funkisarkitektur, og ein har lagt vekt på å behalda mykje av det gamle teglsteinsbygget.

Det skal bli fire leilegheiter i kvar av dei to øvste etasjane. I 1. etasjen vert det næringslokale for kontor eller butikk.

Bygging neste vår

Banksjefen fortel at dersom alt går i orden på den økonomiske sida, vil dei byrja å byggja neste vår.

– Kor lang tid bygginga tek veit eg ikkje, men det nye bygget til Sognekraft har jo reist seg i løpet av eit år. Kanskje me greier det same? undrar Indrehus.