To dagar før møtet vart eit skriv adressert til Fylkesmannen lagt ut på postjournalen til Årdal kommune. Denne er offentleg tilgjengeleg på kommunen sine heimesider.

Inneheld detaljar

Brevet er eit svar til Fylkesmannen i samband med klagen som familien Hunderi har sendt på avlastingstilbodet, og inneheld mellom anna detaljar omkring tilbodet til kvar einskild brukar, kor mykje dei tre familiane tek imot i omsorgsløn og ei rekkje kommentarar til familien Hunderi sine klagepunkt.

Skrivet er datert og lagt ut den 14. juni – to dagar før formannskapsmøtet som familiane vart kasta utfrå då dei kom for å høyra kva politikarane hadde å seia om rådmannen si løysing på problemet med avlastingstilbodet.

Låg ute i ei veke

Kommunalsjef Alf Olsen i Årdal kommune legg seg flat og beklagar.

– Det brevet skulle aldri ha vore på postjournalen, det var ein tabbe. Me fjerna det straks då me vart gjort merksame over at det låg ute, seier han, som vedgår at brevet var offentleg tilgjengeleg i ei veke før det vart fjerna.

Forbanna

– Eg vart mildt sagt forbanna då eg såg det, seier Nina Helle Hunderi, mor til Daniel (8), og varslar ny klage til Fylkesmannen.