Politibetjent Rita Skjeldestad, ved Sogndal politistasjon, stadfestar at politiet er blitt kontakta av Sogn barnevern etter at to ungdomar er meld sakna frå ein ungdomsinstitusjon i Sogndal.

– Eg kan stadfesta at me fekk den meldinga i går kveld og at me jobbar med den saka no. Me har ikkje gått ut med noko offentleg etterlysning. Noko meir enn det kan eg ikkje seia, seier Skjeldestad.

Det var mor til ungdomane som kontakta Sogn Avis etter at ho sjølv via politiet hadde fått vite at ungane var meld sakna. Dei to, ein gut på 17 år og ei jente på 15 , vart henta barnevernet den 7.juni og teke med til Sogn.

Familien er no busett på austlandet, etter at dei flytta frå Sogndal i fjor.

– Eg har freista kontakta ungane via mobiltelefon, men får ikkje kontakt. Dei har nok sikkert slått den av. Det var eit stort sjokk for dei å bli tekne med frå heimen og køyrde attende til Sogn av politiet. Der har dei midlertidig bustad på ein institusjon. No er eg uroa for kva som kan ha skjedd med dei, seier mor til dei to.

Politiet vil førebels ikkje gå ut med noko offentleg etterlysning av ungdomane.