Totalt vart det lagt fram 17 såkalla ATK -saker, (Automatisk trafikkovervaking) der tiltalte sin bil var nytta. På samtlege bileter, unnateke av eitt, var solskjermen dradd ned og mannen strakte hals for å skjula ansiktet sitt.

I fire av tilfella, meinar påtalemakta at dei hadde prov gode nok til overtyda retten om at det var eigaren av bilen som sat bak rattet. Eitt av prova var biletet frå 2005, der føraren var litt for sein til å gøyma seg før han vart fotografert.

Årdølen i slutten av 30-åra, nekta for at det var han som hadde køyrt bilen. Han meinte det var kompisar som hadde lånt bilen og drive gjøn med han. Noko retten ikkje festa lit til. Dei fire tilfella han måtte svare for i retten, omhandla fartsoverskridingar frå 91 km/t til 98 km/t i 80-sona.

Retten meinar at hakepartiet på personen bak rattet avslører at det er årdølen som er sjåfør i alle dei fire sakene som retten skulle ta stilling til. Han må difor gjere opp for syndene sine og retten har fastsett bota til 20.000 kroner. Han må i tillegg betala sakskostnader på 5000 kroner.