Først då jenta vart 22 år melde ho frå om det seksuelle overgrepet slektningen hadde gjort mot ho.

I april må ein 28 år gamal sogning møta i Sogn tingrett tiltalt etter straffelova paragraf 195, seksuell omgang med barn under 14 år.

Overgrepet som omfattar samleie og forsøk på samleie, fann stad tilbake til 1996. Då var fornærma ikkje meir enn ni år gamal og vart utnytta av slektningen som var seks år eldre.

– Det er ikkje uvanleg at seksuelle overgrep vert melde til politiet fleire år i etterkant, seier politiadvokat Knut Broberg, som på vegner av Sogn og Fjordane statsadvokatembeter har teke ut tiltale i saka. Først i 2009 melde jenta frå til politiet om kva ho var blitt utsett for som niåring. Hendinga frå 1996 held seg godt innanfor fristen om forelding.

– Etterforsking og innhenting av prov vil bli gjort på vanleg måte, seier Broberg.