Etter mykje fram og attende, har muslimane i Sogn og Fjordane no fått klarsignal for å byggje eit gudshus på Hafstad i Førde. Moskéen blir senter for alle muslimane i fylket, og kjem etter ni år med mykje hindringar og motstand, ikkje minst i Sunnfjord.

I eit brev til Fylkesmannen skriv forstandar i Førde Islamske Senter, Hoje M. Ibrahim Zarghoon, at løyvet dei no har fått frå Førde kommune er noko alle muslimar er takksame for. No ønskjer trussamfunnet å få rådgjeving frå Fylkesmannen i prosessen med byggjing av det store samlingssenteret, som vil liggje mellom E39 og sentralsjukehuset.

I eit brev frå Førde kommune seier rådmann Ole John Østenstad, at dei vil hjelpe muslimane i arbeidet med å erverve byggjetomta frå grunneigar Jan Ove Hafstad.

Gudshuset til muslimane i Sogn og Fjordane vil få namnet "Ibrahim Khalil", oppkalla etter ein kjend mann frå Koranen.