Rundt årsskiftet 2008/2009 starta Jostedal bygdelag opp tilflyttingsprosjektet sitt, eit prosjekt retta mot folk som kunne tenkja seg å slå seg ned i bygda. Fram til no har prosjektet gjeve som resultat at det har flytta 13 personar til Jostedalen, og som ei følgje av dette har skulen i byga fått tre nye elevar.

Vil halda fram

Fram til årsskiftet hadde tilflyttingsprosjektet kosta om lag 260.000 kroner, pengar som bygdelaget har fått frå Luster kommune, landbruksavdelinga hjå Fylkesmannen, fylkeskommunen, Luster sparebank og bruk av bygdelaget sine eigne midlar.

Å halda prosjektet økonomisk på fote ut inneverande år, vil kosta om lag 160.000 kroner, og bygdelaget vonar at dei saman med kommunen, Fylkesmannen og ein sponsor skal få tak i desse midlane.

Sjølv vil bygdelaget setja av 50.000 kroner, og torsdag vedtok formannskapet å gje tilflyttingsprosjektet ein tilsvarande sum frå næringsfondet.

Signalhus

Løyvingsvedtaket i formannskapet var samrøystes. Men politikarane gav signal om at dei gjerne ser at det blir markert i marknadsføringa av prosjektet at Jostedalen er ein del av Luster kommune.

For og lukkast med tilflytting, må det også finnast bustader som tilflyttarane kan bu i. Dette er ein flaskehals i Jostedalen. Det er difor teke kontakt med ein arkitekt for å utvikla ein spesiell type hus for folk med aktiv livsstil, og som ønskjer å bu lite, billeg og miljøvenleg midt i naturen.

Signalhus blir dette huset omtala som, og tilflyttingsprosjektet vonar at denne hustypen skal stimulera til nybygging av hus i Jostedalen. Og samstundes gje bygda blest som eit friluftsmekka ein kan bu i.