Årsmeldinga for Sogndal bibliotek for 2009 syner at biblioteket har lagt bak seg eit aktivt og godt år.

Utlånstala for biblioteket viser ein auke på heile 11,5% i 2009 i høve året før, og er no på nærare 40.000 utlån.

– Det gode resultatet har sikkert fleire årsakar. Bibliotekbrukarane ønskjer tilbod over eit vidt spekter og dei økonomiske råmene set grenser. God og gjennomtenkt utnytting av dei økonomiske ressursane er derfor svært viktig, seier biblioteksjef Signe Witsø.

Eit av resultatmåla for Sogndal bibliotek for 2009 var å gjennomføre tiltak knytt til formidling av litteratur for vaksne. I høve dette arrangerte biblioteket forfattarbesøk med Rune Timberlid i fjor vinter.

– Ei tralle med bøker vart plassert på Sogndal omsorgssenter. Her kan dei som vil finne seg noko å lese/bla i eller sjå på bilete/foto. Innhaldet på tralla vert skifta med jamne mellomrom.

Tilbod om litteratur på morsmålet til asylsøkjar, flyktningar og andre med framandspråkleg bakgrunn er eit sjølvsagt tilbod på biblioteket.

Sist haust starta biblioteket opp med bokkafé på nokre fredag føremiddagar med formidling av bøker. Dette er eit tilbod som har vorte godt motteke.

– At publikum møter engasjerte og kunnskapsrike tilsette med lang erfaring er ein viktig faktor for trivselen i biblioteket, opplyser Witsø.