– Galskap sett i system. Slik karakteriserer Leif Bolstad det nye systemet for å få attende reiseutgifter ved pasientreiser.

Enorm påkjenning

67-åringen i Lånefjorden har reiser til behandling ein gong i veka i samband med kreftsjukdomen. Sjukdomen tek på, men det gjer også papirmølla han må gjennom for å få att pengar han har krav på etter reisene sine.

– Det er ei enorm påkjenning å hamna i dette systemet. Eg føler at me blir mistenkjeleggjorde heile vegen. Det kjem på toppen av at du lir av ein alvorleg sjukdom. Eg hadde ikkje i min villaste fantasi trudd at eg skulle oppleva noko slikt, seier Leif Bolstad.

Bolstad fortel om ein veldig kamp for å få tilbake dei faktiske utgiftene han har lagt ut.

– Etter jul har eg sendt inn seks rekningar, som eg ikkje har fått noko svar på. Eg har uteståande opp mot 15.000 kroner, men veit ikkje når eg får desse pengane, eller om eg får alt eg har krav på, seier han.

Kaos

Det har også vore ein stri tørn med å få sakshandsamarar til å forstå skilnaden på sommar- og vinterrutene til Fjord 1, og kor mange timar det er i eitt døgn. På toppen av dette blir det utbetalt ulike beløp for same reiseruta.

– Prøver du å nysta opp i dette, er det for det første vanskeleg å koma gjennom på telefon. Kjem du gjennom, får du sjeldan svar på det du spør om. I svarbreva står det ikkje kven som er sakshandsamar, og det gjer sjølvsagt dette endå meir kaotisk, seier Bolstad, som også peikar på at reiseskjema som ein må nytta ikkje held mål.

– Skjemaet er fullstendig ubrukeleg. Blant anna er det ikkje lagt til rette for å fylla inn at ein har følgje på reiser.

Han meiner systemet ikkje fungerer i det heile, og krev at politikarane tek tak.

– Galskapen kan ikkje halda fram. Det er så tungvint og så mykje rot at folk gir opp, og dermed går glipp av det dei har krav på. Politikarane må gripa inn og setja ein stoggar for makkverket, meiner Bolstad, som vonar lokale hender igjen får ansvaret for dette området.

Ny organisering

Konstituert leiar for pasientreiser i Helse Førde, Kirstin Vik, beklagar at Leif Bolstad har opplevd så mykje trøbbel i møte med dei.

– Me er inne i ein situasjon med ein ny organisasjon og store problem med det nasjonale systemet. Dette er inga unnskyldning, men ein freistnad på å forklara kvifor me har hatt ein vanskeleg oppstart, seier Kirstin Vik.

– Trur du at rotet fører til at folk ikkje sender inn krav på det dei har rett på?

– Eg trur ikkje det. Eg håpar folk gir oss beskjed om noko er feil. Me vil ha ein konstruktiv dialog, seier Vik.