– Me ser føre oss ei løysing på produksjon av hybridfelgen i Høyanger no. Alt er ikkje på plass enno. Det som står att er at Innovasjon Norge og St. Jean Industries, det franske selskapet som ønskjer å vidareutvikla og starta produksjon av hybridfelgen, blir samde om vilkåra for overtaking av patentrettane på denne felgtypen, seier ordførar Kjartan Longva i Høyanger.

Eigedomsovertaking

Innovasjon Norge eig både patentrettane til hybridfelgen og industribygget der Fundo Weels heldt til i Høyanger. Hjetland Industripark as, som er eit selskap Høyanger kommune er eigar av, har ein avtale med Innovasjon Norge om å kjøpa Fundobygget, føresett at avtalen mellom Innovasjon Norge og St. jean Industries kjem på plass.

– Går det i orden, kjem Hjetland Industripark til å kjøpa bygget og så leiga det ut til det franske selskapet, seier Kjartan Longva.

– Kan du seia noko meir om når ei avklåring og ein avtale mellom Innovasjon Norge og det franske selskapet vil vera på plass?

– Ikkje noko meir enn korleis status er per i dag. St. Jean Industries vil vera med på informasjonsmøtet som skal haldast i Høyanger i kveld, onsdag. Og vonleg kan dei der fortelja høyangerfolket noko meir om planane sine i Høyanger, sa Longva midt på dagen onsdag.

På dette møtet stadfesta St. Jean Industries sin kontaktperson i Høyanger, Einar Aasen, at dei tek sikte på å starta felgproduksjon i 2011. Aasen, som tildegare var utviklingsdirektør hjå Fundo, fortalde til firda.no at bedrifta i 2011 vil ha14 tilsette, som skal produsera om lag 30.000 felgar. I 2015 meiner Aasen at tal tilsette har auka til 150, og at det blir produsert om lag 500.000 felgar i Høyanger det året.

Omstillingsmidlar

Hjetland Industripark as vart etablert i 2004. Dagleg leiar i selskapet, næringssjef Petter Sortland, fortel at selskapet mellom anna er deleigar i Leira Næringspark i Høyanger.

Hjetland Industripark hadde ved årsskiftet 2008/2009 ein eigenkapital på 2,3 millionar kroner. I samband med at selskapet ønskjer å kjøpa Fundobygget, har Innovasjon Norge kravd at selskapet styrkjer eigenkapitalen sin med sju millionar kroner.

Pengar til å styrkja eigenkapitalen får eigaren av Hjetland Industripark, Høyanger kommune, no stilt til rådvelde gjennom dei ekstraordinære omstillingsmidlane som staten har løyvd til Høyanger kommune.

Desse omstillingsmidlane, total 30 millionar kroner, blir forvalta av fylkeskommunen, og fylkesrådmannen sende 5. mars brev til Høyanger kommune om at det vil bli gjort ei delutbetaling frå omstillingsmidlane på sju millionar kroner.