Leiar nystarta ungdomsparti

Tysdag 9. mars vart Indre Sogn Unge Høgre stifta på Lægreid Hotel i Sogndal.

– Dei viktigaste oppgåvene framover blir å driva opplæring og medlemsverving, seier den nyvalde leiaren, Stine Sandvik (17).

– Eg er glad for at me har fått lokallaget opp og gå, og eg ser fram til å byggja opp eit aktivt lokallag som skal delta i samfunnsdebatten i Indre Sogn, seier Sandvik.

Med seg i styret har ho nestleiar, Vilde Tøfte Øvstetun (16) frå Kaupanger. Styremedlem er Cathrine Brendstuen (18), Gaupne, Hanne Nævdal (13), Gaupne og Elisabeth Veum (17), Indre Hafslo. Sandvik sjølv er også frå Gaupne.

Til helga deltek to av medlemmane på fylkesårsmøtet til Sogn og Fjordane Høgre i Flåm. Alt om to veker skal fleire av medlemane delta på konferanse på Austlandet saman med andre Unge Høgre-medlemmar frå heile landet.

Sandvik lovar at Unge Høgre skal vera med å løfta Høgre enda meir, og sørgja for at ungdom blir kjend med politikken. Ho viser blant anna til at Høgre gjorde eit godt val i fjor haust med å få Lødemel på Stortinget, og at 1. vara no er avtroppande Unge Høgre-leiar Jacob Nødseth.