– Gjensidige åleine har teke imot rundt 150 skadar som er jamt fordelt over heile fylket, fortel Arne Voll, informasjonsansvarleg i Gjensidige Forsikring.

20 millionar

Han opplyser at ingen område eller kommunar peiker seg særskilt ut med færre skader enn andre.

Totalt for bransjen reknar Gjensidige i Sogn og Fjordane med at frosten i denne perioden har gjort skade for mellom 15 og 20 millionar kroner, vert det opplyst i ei pressemelding.

– Mange delar av landet er vane med lange periodar med kulde. Vestlandet har derimot hatt sin lengste kuldeperiode på svært lang tid. Dette har ført til ekstraordinært mange vass- og frostskadar i denne delen av landet.

Nøydde til å flytta

Ved sida av at det er mange som har fått røyra sine frose inne i bustaden, er det også mange som opplever at tælen går så djupt einskilde stader at det er svært vanskeleg å få grave opp utvendige røyr som har frose.

Dette fører i ekstreme tilfelle til at folk har vorte nøydde til å flytta frå huset eller bu utan vatn, fortel Voll, som ventar nye bølgjer med vasskadar når mildvêret slår til og is og snø tinar.

Han ber folk spa vekk litt snø rundt husveggene og sørga for at sluk og avløp er opne.

– Eit godt tips kan også vera å laga ein opning i snøen eller isen slik at smelta vatn renn vekk frå huset, seier han.