Laurdag vert NM i fjelltelemark arrangert frå Kjeringafjellet i Leikanger, og det skjer mykje i samband med meisterskapen.

Booka etter Veka

Mellom anna skal sognabandet Tyyl! ha konsert på Sognefjord Hotel om kvelden.

– Dette bryt med musikken me vanlegvis har på Knausen. Me gledar oss og har fått tak i eit anlegg som skal gje skikkeleg trøkk. Det skal rista heilt opp til Statens hus, lovar Håvard Nesbø, mediekoordinator for NM.

Han høyrde Tyyl!, som spelar rock på sognamål, på Meieriet under studentveka for to veker sidan.

– Det var den konsertopplevinga som gjorde at dei vart booka av oss. Det var så bra så me heiv oss rundt, fortel Nesbø, som tykkjer det er kjekt å få visa fram lokal musikk til dei mange tilreisande.

Med Tyyl! på programmet håper NM-festen å nå yngre folk. Men det vert også noko for dei som likar best tradisjonell dansemusikk. Før og etter konserten med Tyyl! spelar trubaduren Tore Leiren opp til dans.

I tillegg til arrangementet på hotellet vert det arrangert Open Hall i kultursalen, der Ungdomes Kulturmønstring vil gå av stabelen like etter premieutdelinga frå rennet.

– Fantastisk

Minst 60 frivillige har vore med for å få alt klart til rennet i helga, der den gjeve Kongepokalen skal delast ut.

– I tillegg til det som skjer rundt sjølve rennet har barneskulen og ungdomsrådet bidrege til det som skal skje på kveldstid, so me har fått mobilisert heile bygda. Alle har gjort ein utruleg god jobb, seier løypesjef Egil Johannes Vangsnes.

Om lag 100 deltakarar er venta å delta i rennet.

– Eg har køyrt i gjennom løypa nokre gonger, og den er heilt fantastisk, seier Vangsnes, som oppmoda folk i regionen om å ta turen til målområdet på laurdag, slik at det blir skikkeleg stemning rundt løpet.

Heggmyrane

Også på Heggmyrane har det vore mykje dugnadsarbeid i forkant av NM telemark storslalåm 2010, som går føre seg søndag.

– Me er 50–60 personar som er med totalt. Det meste er klart, det einaste som gjenstår er å få opp éin kilometer med sikringsnett, det skal gjerast på laurdag, seier Øystein Veum i arrangementskomiteen.

Løypa vert på 280 høgdemeter, og vil ta om lag 50 sekund å køyra ned. Like før målgang vil det vera eit hopp der deltakarane må landa med telemarknedslag for å få løpet godkjend.