Statens vegvesen opnar for sykkel i dei to tunnelane mellom Sogndal og Leikanger.

– Det gjer oss i stand til å starta oppkøyringa framfor sesongen, seier Stig Vattekar, som testa Stedjebergtunnelen i går ettermiddag, saman med lagkamerat Erik Stedje.

Miljøvenleg

Dei to er samde om at tunnelen er eit godt alternativ i periodar med vinterstengd veg på utsida av tunnelen.

– Det fremjar miljøvenleg pendling mellom Leikanger og Sogndal, men også trening, seier han.

Han er takksam for at Statens vegvesen har gått med på dette.

– Me har teke ned forbodsskilta, opplyser Magna Vangsnes, seksjonsleiar ved Statens vegvesen.

Prøveordning

Ho presiserer at tiltaket er mellombels.

– Det er for å gjera det farbart for syklande i periodar det ikkje er farbart for sykkel på utsida, seier Magna Vangsnes.

– Kor lenge skal denne ordninga vara?

– Dette er å sjå på som ei prøveordning, det kjem førebels til å gjelda for denne vinteren, seier Magna Vangsnes, og legg til grunn at vegen på utsida blir sykkelveg att straks vegbana er farbar.