DNT Oslo og omegn (DNT) har drive leiraktivitet på Tungestølen på Veitastrond sidan 2001. Dette har vore populære arrangement.

Fast stad

DNT har dei siste par åra gjort ei vurdering på om dei skal satsa på ein fast leirstad i Noreg for desse arrangementa, som fram til no har vore gjennomført på ulike plassar.

Etter ei vurdering i organisasjonen har leiinga avgjort at dei vil byggja opp ein meir permanent plass på Tungestølen med namn Bace Camp Tungestølen.

Utvikla området

No ønskjer DNT å byggja opp eit lager og eit administrasjonsbygg med kontor og kjøkenkrok. Det skal også byggjast toalett. DNT vil også utvikla område for klatring, hinderløype, eventyrløype og natursti. Dei vil samarbeida med bygda om merking og vedlikehald av stiar og bruer.

Leiren kan også leigast ut til andre enn DNT, som planlegg å nytta plassen frå om lag 1. juli og fram til skuleferien er slutt.

Toalett

Den totale kostnaden for heile anlegget er planlagt til 1.1 million kroner. DNT arbeider no med søknader til fleire aktuelle institusjonar for medfinansiering.

Luster kommune har fått spørsmål om sponsa anlegget med 75.000 kroner til leirstaden. I tillegg er dei spurde om dei kan ta kostnaden med drifting av toalett i sesongen når leirstaden ikkje er open. Toalettet vil vera ope for alle, også når leiren er i bruk. Luster formannskap stiller seg positiv til søknaden.