Butikken i Sogndal er den einaste av dei litt over 160 butikkane i Meny-kjeda som nyttar nynorsk i sitt annonse- og reklamemateriell, men det har ikkje vore noko lett sak å få trumfa gjennom hjå dei sentrale styringsorgana. Butikksjef Rolf Navarsete har jobba hardt og målretta for å få det til, og seier det er ein evig kamp.

– Det har skjedd mykje i daglegvarebransjen dei siste tjue åra med nye og større kjeder. For kvar gong me har bytt kjede, har eg måtta teke diskusjonen og kampen for å få nynorsk på reklameplakatar og i annonsane om att og om att.

– Eg har ikkje vilja gjeve opp heller, dette har med identitet og kultur å gjera, men eg skal ikkje leggja skjul på at det er vanskeleg å overtyda dei som sit sentralt om at det bør vera slik, seier Navarsete, som altså er den einaste i heile Meny-kjeda som insisterer på dette.

– Det at dei vil ha eitt språk har sjølvsagt med økonomien å gjera, det blir jo dyrare å trykkja reklamemateriell to gonger. Då me gjekk inn i Meny i 2005 måtte eg bruka tid på å overtyda folk om at me måtte får annonsera på nynorsk og ein må stadig halda folk litt i øyra når det gjeld akkurat dette.

– Eg ser på meg som sogning, og dette handlar om vår identitet, det er det same som det er språk eller transport eller kva det måtte vera. Når «sentrum» oftast er definert som området rundt Oslo, er også det meste av tankegongen basert rundt dette, og når det har vore slik lenge nok, blir det vanskelegare å komma med nye impulsar, seier han.

Les meir i dagens utgåve av Sogn Avis