– Det kjennest bra, og det er utruleg morosamt, seier sogndølen Stian Langeteig.

Han er til dagleg vinkelner på restauranten swedish taste i Göteborg. I helga fekk han testa kunnskapane i ein omfattande konkurranse. Dei 12 deltakarane måtte først igjennom ei skriftleg prøve, på engelsk, med mange spørsmål om teori, mellom anna ei vinliste med feil i, som deltakarane skulle retta.

Teorien omfatta elles alt av drikkevarer og produksjon, samt sigarar. Så var det blindsmaking av vinar og sprit, der vinane skulle skildrast best mogleg. Deltakarane måtte og definera type sprit og kvar den kom frå. Dei tre som gjekk vidare måtte gjennom ein ny runde med blindsmaking, og svara måtte framførast munnleg, på engelsk. Vidare stod dekantering på programmet, og i tillegg måtte dei anbefala øl til ein femrettars meny.

– På slutten fekk me ei surprise-oppgåve. Me skulle skjenkja 18 glas champagne frå ei magnumflaske. Hellinga i kvart glas skulle vera kontinuerleg, mengda i kvart glas skulle vera lik, og flaska skulle vera tom til slutt, seier Langeteig.

Sogndølen gjekk til topps i konkurransen. Han stilte og i fjor, og då vart han nummer to av 13 deltakarar.

Stian Langeteig har teke utdanninga si i Sverige, og har jobba på swedish taste sidan september i fjor. Ein vinkelner jobbar med alle typar drikkevarer, innkjøp, og det å setja saman mat og drikke. Vinkelnarar held også litt smaking for folk, og arrangerer mindre kurs.