Elevar etterlyser rektor

Fylket ropar etter arbeidsplassar for høgt utdanna. Slike arbeidsplassar finst i Fjærland, men vanlege utlysingskanalar når ikkje ut til nok folk, meiner elevane i Fjærland. Difor går dei no til pressa.

– Har alt utanom folk

– I Fjærland har me alt utanom folk! Her finst det jobb, hus til utleige, barnehageplass og masse aktivitetar for born og vaksne, skriv Anne Mari i 6. klasse, medan Kari Sunniva lovar at alle vil bli tekne godt imot.

Stillinga ved skulen er i utgangspunktet vikariat, slik at folk kan prøva ut kva dei synest om både arbeidet og bygda. Elevane ved Fjærland skule er sikre på at eventuelle innflyttarar vil trivast. Hege i 7. klasse opplyser at det finst eit rikt organisasjonsliv for alle aldrar, medan Svein Kristian peiker på at Fjærland ligg sentralt i fylket, og har kort veg for dei som må pendla til Sogn eller Sunnfjord.

Rikeleg grunnar

– Me har mykje som ikkje finst andre stader, til dømes bremuseet og bokbyen, seier Ingunn. Ho blir supplert av læraren, som sjølv er innflyttar.

– Det er plass til nyskapande næringsliv her i bygda. Folk torer å tenkja annleis, og det er høgt under taket for nye idear. Det er ein av grunnane til at me flytte hit. Mentaliteten og samhaldet her var noko som lokka oss, fortel Eivind Ødegård, opphaveleg frå Valdres.

Elevane på si side vonar på ein fast lærar, slik at det blir færre vikarar på skulen, og meiner det skulle vera rikeleg av grunnar til å ta med familien og setja kursen mot den oppfinnsame, trivelege og velorienterte vesle bygda i Sogn.