Luster Arbeidarparti har hatt sin del av interne stridar å hanskast med dei siste åra. No har partiet valt å sjå litt utover eigne kommunegrenser, og på årsmøtet var det tunnel under Sognefjellet, frå Fortun til Bøverdalen eller Leirdalen på austsida av fjellet, som var hovudtema.

Ferjefritt

– Luster Ap vil arbeida for realisering av Sognefjellstunnelen som eit første trinn i eit ferjefritt stamvegsamband mellom Stavanger og Trondheim, og oppmodar fylkespartia langs sambandet til å setja saka på dagsorden snarast råd, skriv Luster Ap i ein uttale frå årsmøtet sitt.

Noko som betyr at dei utfordrar så vel Sogn og Fjordane Ap, som fylkespartia i Rogaland, Hordaland, Oppland og Sør-Trøndelag til å ta tak i denne stamvegsaka.

Det blir synt til at Sogn Regionråd har pussa støvet av saka om tunnel under Sognefjellet, og at fagfolka i Statens vegvesen har sagt at dette er visjonar som det er fullt mogleg å realisera. Gjeve at viljen er til stades.

Langsiktig

Ein tunnel under Sognefjellet vil bli mellom 17 og 24 kilometer lang, avhengig av kva trasé som blir valt. Luster Ap er klar over at eit slikt vegsamband vil krevja store investeringar, og kan sjåast som uoppnåeleg i eit kort tidsperspektiv.

Men årsmøtet i Luster Ap meiner at ein må tenkja langsiktig i denne saka, og det blir synt kva som har skjedd med samferdsla i Indre Sogn i løpet av dei siste 25 åra. Dei meiner at det var dei færraste som skjønte rekkjevidda og moglegheitene som låg i at samband som Årdal – Lærdal – Kaupanger, Fjærlandsvegen og Lærdalstunnelen skulle bli realisert. Og at ein no i tillegg er på god veg til å rusta opp desse vegane vidare, både mot aust, vest, sør og nord.

– I eit slikt perspektiv er ein innsats for Sognefjellstunnelen både realistisk og naudsynt, skriv Luster Ap i uttalen sin.