Ei kvinne i 40-åra frå Indre Sogn ligg på sjukehus i Innsbruck kritisk skadd etter at ho vart teken av snøskred i fjellområdet ved vintersportsstaden St. Anton i Austerrike laurdag. Kvinna var med i eit følgje på fire, og i ei skråning på vel 30 grader vart ho teken av eit om lag 15 meter breitt snøskred.

Førstehjelp

Dei andre som var med i følgjet, fekk kvinna ut av snøskredet etter om lag 15 minuttar, og gav henne førstehjelp til ambulansehelikopter kom fram. Ifølgje nettavisa tt.com. vart kvinna først sendt til sjukehus i byen Zams.

Ho vart seinare sendt vidare til sjukehuset Insbrucker Klinik i Innsbruck. Nettstaden tt.com skriv at tilstanden til kvinna skal vera kritisk.

Sogn Avis var søndag ettermiddag i kontakt med kommunikasjonseininga i Utenriksdepartementet. Pressekontakten der, underdirektør Ragnhild Imerslund, fortel at departementet ikkje har fått noko melding om ulukka, men at dei er kjende med den gjennom media.

Ifølgje tt.com var det dårleg vêr i St. Anton-området laurdag. Det var snøskredfare målt til styrke tre i ein skala frå ein til fem i regionen.